Frá upphafi stofnunar Rannsóknastofnunar í barna- og fjölskylduvernd (RBF) árið 2006 hefur sjónum verið beint að ofbeldi í fjölskyldum með rannsóknum og fræðslu. Stofnunin hefur í samstarfi við félags- og tryggingamálaráðu neytið unnið að rannsóknarverkefni í sex hlutum sem snýr að ofbeldi gegn konum (og þar með fjölskyldunni allri) í tengslum við aðgerðaráætlun stjórnvalda gegn ofbeldi karla gegn konum. Þá hafa fræðimenn á vegum Rannsóknastofnunarinnar haldið fjölda fyrirlestra um ofbeldi í samstarfi við marga aðra aðila. Mikilvægt er að ræða ofbeldi opinskátt í þjóðfélaginu til að auka þekkingu á málaflokknum og viðhorfum fólks til ofbeldis.
Hér á síðunni er að finna rannsóknir, fræðsluerindi og annað efni sem RBF hefur birt varðandi ofbeldi gegn konum og ofbeldi í fjölskyldum og þar með ofbeldi gegn börnum.
Á síðustu árum höfum við byggt upp þekkingu á málaflokknum með rannsóknum og næstu skref eru að nýta þekkinguna til frekari starfa til að fyrirbyggja ofbeldi:
- með fræðslu til fagfólks og almennings
- með útgáfu fræðsluefnis
- með samstarfi við aðila sem starfa með þeim sem beittir hafa verið ofbeldi
- með frekari rannsóknum
Rannsóknastofnun í barna- og fjölskylduvernd er í samstarfi við barnaverndaryfirvöld, félagsþjónustu, lögreglu og heilbrigðisyfirvöld. Eingöngu með samstilltu átaki allra aðila er hægt að útrýma ofbeldi.